Die huidige bestuur van ons Kerk het, as een van
ons grootste doelwitte en deel van ons toekomsvisie die opleiding van pastore,
asook bestuursrade geprioritiseer. Wanneer ons van opleiding praat, gaan dit
nie oor akademiese kwalifikasies en titels nie, maar veel eerder praktiese
hulpmiddels en toerusting om vandag se kerk te bedien en geestelik te voed. Dit
is egter net so belangrik. Hierdie opleiding behels egter ’n baie groot
finansiële uitleg, wat doodeenvoudig nie deur ’n oorverpligte Hoofkantoor, of
die plaaslike gemeentes gefinansier kan word nie. Die doel is om opleiding vir
alle pastoorspare gratis aan te bied, sodat elkeen ten beste vir sy en haar
taak toegerus kan word, sonder addisionele uitleg vir die pastoorspaar self.
Die volgende aspekte van opleiding het dan ook indringend aandag geniet:
- Die Kerk
se Seminarie se eie curriculum is opgegradeer sodat die Sertifikaatkursus dien
as oorbruggingskursus vir universiteitstoelating.
- Die
Seminarie is aanvaar as satellietkampus van die Noord-Wes Universiteit vir die
kursus BTh Praktiese Teologie.
- ’n
Lisensiaat is verkry vir die aanbieding van die volledige kursus van die International School of Ministry, vir beide Suid-Afrika en
Australië.
- Drie weke
intensiewe Gebedshuisopleiding, vir alle voornemende pastoorspare, is vanaf
2010 ingestel.
- Verskeie
praktiese, uiters effektiewe seminare en kort kursusse is gefasiliteer en vir
die pastoorspare aangebied, sedert 2010.
- Bestuursrade
is onderwerp aan vele kursusse in streeksverband.
Enkele voorbeelde van ander terreine waar
Hoofkantoor, onder die huidige bestuur, ‘n baie groter verantwoordelikheid as
in die verlede neem, is onder andere die volgende:
- Die
daarstelling van ’n maandelikse welwillendheidsbedrag, huidiglik R 2 100.00
per maand, vir elke pastoor wat uit die voltydse bediening uit ons Kerk
afgetree het, hetsy dit as gevolg van emeritaat of gesondheidsredes was, wat
nie eie eiendom besit of selfversorgend is nie.
- Afgetrede
pastoorspare wat nie oor akkommodasie na hul aftrede beskik nie, word sover as
moontlik teen uiters billike en gesubsidieerde tariewe gehuisves by die Willie
de Waal Woonstelkompleks in Pretoria, indien hulle gewillig is om daar te bly.
- ’n Maandelikse
welwillendheidsbedrag wat vir die vorige, afgetrede Moderator betaal word.
- Die gee
van ’n verjaarsdaggeskenk vir elke lewende, afgetrede pastoor en sy gade.
- Die
subsidiëring van gemeentes waar pastore, wat totaal onder die broodlyn leef,
ook nie die voorreg van ’n pastorie het nie en dus behuising moet huur.
- Die
planting van nuwe gemeentes, waarvan die laastes Bloemhof en Thaba Patsoa was,
in 2017. Daar is reeds 24 nuwe gemeentes geplant sedert 2010.
- Die Nasionale
Konferensie lokaal te Helderberg is in totaal opgegradeer, ook wat die
akkommodasie aanbetref. Hierdie hele projek was op sigself gedryf via NASFO.
- Die
ondersteuning van projekte onder alle bevolkingsgroepe in die Kerk, om die
daarstelling van aanbiddingsplekke te realiseer.
Al die bogenoemde doelwitte sou onmoontlik wees,
sonder die reuse insette van NASFO, aangesien dit ’n substansiële, finansiële
uitleg geverg het. Ons is bevoorreg om in ons Kerk vandag uiters suksesvolle
besigheidsmanne as lidmate te hê. Van hierdie mense is, as gevolg van hulle
daaglikse blootstelling op verskillende terreine van die besigheidswêreld,
beter ingelig en bekwaam om finansies te genereer, as wat menige pastoor ooit
kan wees. In die woorde van sommige van hierdie persone, is hulle dalk nie
musikante of predikers of het dalk selfs nie die tyd om op plaaslike vlak by
bestuursrade betrokke te raak nie, maar wil hulle graag op die terrein waarop
hulle sterk ontwikkel is, naamlik die identifisering van besigheidsgeleenthede
en die gepaardgaande generering van fondse, hulle talente ten bate van ons Kerk
aanwend.
Dit het ons gebring by die sameroeping van die
huidige Sakeforum, in Mei 2010. Enorme doelwitte is reeds deur hierdie klein
groepie formidabele mense bereik, huidiglik 22 getroude pare en een alleenlopende
broer, bygestaan deur nege pastoorspare. Tesame met hulle investering, het die
Here ook uiters bekwame pastoorspare en dosente, vir die Kerk voorsien om die
bogenoemde doelwitte te laat realiseer.
Soos reeds genoem, het hierdie poging ’n direkte
effek op die groei van ons Kerk en is daar op alle terreine reeds positiewe
groei aangeteken, hetsy dit in getal, finansies of aanbieding by die plaaslike
gemeente is.
